廠商會衝出亞洲 考察埃塞俄比亞
2018-09-14

【明報專訊】國策一帶一路相信令大家認識咗唔少過去無聽過嘅國家,唔少團體亦組團去中亞細亞一帶考察,廠商會嚟緊亦會有考察團,將會衝出亞洲,去到非洲埃塞俄比亞,等港商了解吓當地商機。

廠商會下星期二(18號)會由會長吳宏斌帶隊,一行10幾人去埃塞俄比亞展開為期5日嘅訪問,考察團成員將會拜訪埃塞俄比亞政府、當地嘅工業部、投資委員會同中國駐埃塞俄比亞大使館等,同當地市政府官員、中國駐埃塞俄比亞大使館代表會面,了解當地最新嘅工商業發展同營商情况,睇吓可以點樣促進兩地經貿合作;亦會參觀當地嘅港資鞋廠、由華人開設嘅工業園等,尋求合作同發展契機。

吳宏斌話,面對中美貿易戰,唔少港商都考慮將生產線轉移到東南亞及非洲等地,積極開拓多元市場,埃塞俄比亞係非洲一個重點國家,喺一帶一路戰略上具地緣優勢,勞動力充足而且工資亦都較低,已經吸引不少內地廠家落戶,希望今次可以令業界親身認識埃塞俄比亞嘅營商環境、幫業界開拓新合作商機咁話。

一帶一路文章