華商論壇隔年搞 中總稱中央認可林鄭支持
2018-08-09

【明報專訊】兩年一度嘅世界華商大會上年喺緬甸仰光舉行,有近3000華商參加,特首林鄭月娥擔任主旨演講嘉賓推廣香港。中華總商會係大會嘅3個召集組織之一,中總會長蔡冠深噚日話林太上年參加完大會,力推香港都應該搞一個類似嘅論壇,促進香港成為世界華商合作、聯誼嘅平台。蔡會長話,中總得到中央認可、林太支持,決定隔年搞一次「世界華商高峰論壇」,首次嘅論壇定於本月23日喺灣仔會展舉行,邀請咗全球華商、中央同香港官員、專家學者,逾800人一齊探討喺一帶一路同大灣區嘅新機遇。

蔡會長透露,佢哋邀請咗全國政協副主席辜勝阻、僑辦主任許又聲及商務部官員出席演講,屆時林太及中聯辦主任王志民都會出席並致辭。

中總早前已訂好晒場地搞大灣區論壇,但隨住國務院嘅大灣區規劃遲遲未公布,日期一改再改,蔡冠深話佢𠵱家冇把握預計規劃幾時公布,因為中美貿易戰等因素,中央或需要不斷調整規劃,措施成熟一項推一項。

一帶一路文章