【Emily】光頭警長話好番 快返前線
2019-11-11
光頭警長劉sir(後排左二)日前出席撐警活動,同大批支持者合照,部分人手持國旗。(短片截圖)

【明報專訊】喺內地紅咗嘅「光頭警長」劉澤基,早前曾經話會將仔女送去大灣區讀書,佢接受《北京日報》訪問時話「可以肯定的是,我會在粵港澳大灣區置業」,仲透露曾經同太太去深圳、珠海、中山等城市睇樓,但具體地點、時間表未定,要視乎小朋友喺邊度返學。

話肯定會大灣區置業

自從成為「網紅」後,劉sir都心繫內地,佢話上次隨國慶團上京,除咗參觀長城,有好多願望未完成,期望下次以私人身分帶家人去北京行故宮,又話好期待同北京嘅朋友見面。此外,綽號「大波man」嘅石房有等上周四(7日)向警察送上物資打氣,劉sir當日都有出席,多人同佢自拍,佢就形容市民「物輕情義重」。

繼續大談近日社會情况

警例寫明警員「非為執行職務下,不能公開發表政治言論」,劉就繼續大談近日社會情况,話警察「止暴制亂」,多咗拘捕示威者,向社會發出犯法會被捕嘅信息,形容「(示威者)人數少咗,係階段成績」。劉又話自己喺6月12日警民衝突中因為被擲磚,令膝有碎骨,上月4日做手術拎番出嚟後康復良好,應該可以好快返前線。

粵港澳大灣區文章