林太:灣區可成東方矽谷
2019-03-26
林鄭月娥(圖)前日忙裏偷閒,去咗觀賞釣魚台國賓館盛放嘅梅花,話係「為忙碌嘅星期日添上一點閑逸」。(林鄭月娥fb圖片)

【明報專訊】國務院上月中頒布《粵港澳大灣區發展規劃綱要》,入面提出2035年要成為「世界一流灣區」;特首林鄭月娥噚日喺北京出席「2019中國發展高層論壇」,更形容粵港澳大灣區有望成為「東方矽谷」,可以成為同時具備矽谷同華爾街嘅城市群。

赴京發展論壇致辭

去國賓館賞梅意外收穫

林太喺論壇上嘅「全球經濟中的粵港澳大灣區」環節以英文致辭,話香港特區多方面嘅工作,加速在大灣區內主要科技基礎建設,推動跨境、跨學科嘅合作研究項目,並將加強「產、學、研」嘅深度整合;而香港有具深度同流動性嘅資本市場,可提供私募基金直接融資或通過上市籌集資本嘅渠道,有助推動科技成果作商業應用。佢之後就話,粵港澳大灣區有望成為「同時具備矽谷同華爾街嘅城市群」。

林太又引述國務院副總理韓正嘅「前所未有」論,闡述3個大灣區特點,佢話會帶領香港喺大​​灣區發展中發揮積極作用,堅守「一國兩制」原則,善用香港長處。

林太過去兩日喺北京,佢前日就喺facebook貼相,形容今次去北京「意外收獲係觀賞釣魚臺國賓館盛放嘅梅花」,釣魚台國賓館唔係一般人可以去得到,林太就乘機打吓卡。

粵港澳大灣區文章