大灣區發展辦公室 申開首長級專員職
2019-03-13
政制及內地事務局長聶德權參觀屯門公園共融遊樂場時,顯得童心未泯,並試玩設施。(聶德權facebook圖片)

【明報專訊】粵港澳大灣區規劃《綱要》上月公布,政制及內地事務局早前向立法會提交文件,話有需要盡快成立專職嘅大灣區發展辦公室,並申請開設兩個為期4年嘅首長級編外職位,分別係粵港澳大灣區發展專員及發展助理專員,另外會新開設17個非首長級職位,包括政務主任、新聞主任等。

當中,專員工作包括制定及統籌大灣區整體政策,亦要同中央高層,包括國家發改委、廣東省政府、相關市政府同澳門緊密聯繫,以及制訂整體宣傳推廣策略等,薪金訂喺首長級第六級;發展助理專員就主力協助制訂監督宣傳大灣區發展等工作。政府預計,兩個首長級職位一年開支合共530萬元,非首長級17個職位合共1240萬元。

政制及內地事務局長聶德權忙於大灣區工作嘅同時,日前就去咗屯門,仲參觀屯門公園共融遊樂場,照片所見局長都幾投入,試玩設施,仲話要誠意向有膽識嘅小朋友推薦7米高嘅攀爬塔挑戰自己。局長又話佢聽到有家長提出,希望每區都有共融遊樂場。唔知以後會唔會實現到呢?

粵港澳大灣區文章