話大灣區係「家嘅延伸」 如過隔籬房 霍啟剛向「北上」說不
2019-03-11
全國政協委員霍啟剛噚日喺記者會話,唔希望再用「北上」形容大灣區。(中新社)

【明報專訊】《粵港澳大灣區規劃綱要》早前公布,身處北京嘅全國政協委員霍啟剛噚日喺記者會上就話,大灣區係「一個家的擴大,一個家的延伸」,唔希望再用「北上」呢個詞語去形容大灣區,「(北上)這給人的感覺好像很遠」。

唔希望再用「北上」形容大灣區

霍啟剛噚日喺政協記者會上話,香港人經常開玩笑,話深圳以北都係「北方」,佢話唔想用「北上」呢兩個字形容大灣區,認為必須改變概念,大灣區「只不過是一個家的擴大、一個家的延伸。可能以前是兩居室的,現在買了一個疊層的別墅,家變大了,沒有離開家,沒有出門,就是房間多了而已」。

霍啟剛舉例,𠵱家有高鐵,20分鐘就可以由尖沙嘴去福田、深圳北,一個鐘就可以經港珠澳大橋去到珠海,「所以哪來的北上?」話要向年輕人強調「一小時生活圈」,打破過境、過關嘅心理障礙同隔膜。

莫乃光質疑規劃為國家多過為香港

資訊科技界立法會議員莫乃光就喺港台節目《給香港的信》話,大灣區規劃出台後,可見中央政府主要係利用香港嘅學術、研究能力,以及吸引香港專業人士返內地做嘢,質疑呢類政策喺北京眼中,係咪只為國家利益而行,多過睇香港嘅利益。

粵港澳大灣區文章