曾鈺成談《大灣區綱要》 質疑林鄭聶德權說法矛盾
2019-02-26

【明報專訊】中央上周公布《粵港澳大灣區發展規劃綱要》,政制及內地事務局長聶德權其後喺電台節目講,《綱要》係方向,唔係當中有提及,香港就必須實施。立法會前主席曾鈺成就喺專欄文章發炮,話綱要都寫咗唔少廣東省政府要做嘅便利港人措施,「試想想,假如廣東省省長現在出來說,『綱要寫了的東西,廣東不一定要做』,那會給港人發出甚麼訊息呢?」佢甚至話,首先要對綱要加深理解嘅人,係特區政府官員。

曾鈺成噚日喺報章am730專欄中,講述特首林鄭月娥同聶德權對於有人話香港「被規劃」有唔同回應:林太強調特區政府積極全面參與制定綱要,意見亦獲接納,過程中努力反映諮詢業界及持份者所得嘅意見。曾鈺成話按林太所講,綱要關於香港嘅內容係政府徵詢各界意見後提出,亦係粵港澳三地政府同中央部委緊密合作、良性互動嘅成果,但聶德權卻指寫咗落綱要,香港都唔一定要做,佢質疑兩人說法有矛盾。曾鈺成又引述林太喺宣講會上話,港府會不遺餘力、竭盡所能推動大灣區發展,「如果特區政府裡負責內地事務的官員認為《綱要》的內容不一定要落實,林鄭這個『表態』還有多大意義呢?」

粵港澳大灣區文章